الأحد، 29 نوفمبر 2009

تحلطـــم تالــــي الليل

زمن مستهترين وفصع ودي ألسبهم بعقالي
نواب أمه لو تهذرون سنين .. حاكو عقالي
شلون صارو العِقال خبــول والخبول عِقالي
من شرى ضماير خـرده بــمبلغ على شيكي
صفقته خسـرانه ورحيلـــــه يالربع وشيكي
مجلس عقل وبالتجربه أرجلهم بدون عقالي

مع الاعتذار لـ حاكي عقالي


*******

تدري يـــا خالـــــــد .. اللــــــي مهونهــــا عليــــــــــــنـا ِمسلم
ذي ليبراليــــه وذاك بـــلا مــــذهـب بـــس بــــالاســــــم مسلم
والبـــــــــــاجي مالهــم داعـــــــي كومبــــارس بفيلــــــم هندي
ذا يــــاكــل فستــــق وذاك يــــــدور واسطات لاجـــــــــل هندي
والثالث نايــــــم والـــرئيس ضايق خلقه يســـولف مع الـ هندي
ولين صحـــو يجذبون واللي يتوهق يبجي وينتهي الفيلم الهندي
ومـــن شافـــهم الهنـــدي إحتار وبعـــد تفكير هون يصير مسلم

مع الاعتذار للــ هندي

الثلاثاء، 17 نوفمبر 2009

النائب الغوغلي .. والوزير أنتخبو ام علي

والله ملينا .. مو من المشاكل ولا من القروض ولا من تدني كل شي بالديره


ملينا من عيد وسعيد .. الي كل يوم طالعين لنا بتصريح ينرفز ويضحك بذات الوقت


مو مفتكين من الاخ غروك عذالي .. السيد مصطفى الشمالي ..

















وتصميمه بأن القضايا ضد البنوك كلام فارغ .. وأن الفوائد عاديه جدا جدا


وأن لا يوجد هناك معسرين ومساجين وملعون خير الطيب ما فيهم

وان نقابة البنوك الكويتيه .. لا تعرف ما تقول بتصريحها الاخير ( لا بد من اسقاط الفوائد )

وان الشعب يتدلع .. والقانون فوق الجميع .. و إنه حالف اذا طيحت الحكومه القروض راح ينتحر !!



بس يبه والله خايفين عليك تحوشك جلطه ولا سكته ماليه بضميرك المفتوح 24 ساعه ..



هذا تعودا عليه

لكن هاللاعب الناشيء اللي يتفنن بالموضوع وصرح تصريح .. محد قاله من قبل .. ومصدر سري للغايه


يقول الاخ إمشو جدام وأنا أرجع قري .. السيد عبدالرحمن العنجري ..
















إنه أجرى بحثا في الانترنت في موقع ( غوغل ) عن موضوع إسقاط القروض ذاكرا أنه لم يجد في نتائج بحثه أي دولة في العالم أسقطت القروض عن مواطنيها
* * *






ما شاء الله وما شاء الله وعيني عليك بارده يا العنجري .. وصلت غوغل ..فعلا البكالوريوس اللي عندك
.. غوغلي إبن غوغلي

ويضيف الزمخشري .. سوري .. العنجري


وأضاف العنجري أنه متأكد بعدم وجود مشكلة في القروض , والجدير بالذكر أن عند عرض فكرة إسقاط الدولة لقروض المواطنين على خبير اقتصادي سويسري أجاب : إنها فكرة غريبة جدا ، حيث لا يحتوي القاموس الاقتصادي على مصطلح " إسقاط القروض " .


الصراحه احيي وابارك لشعب الكويت وجود نائب له صفات غير موجوده بالمنيو الكويتي .. انسان مثقف جدا


وما يهتم بالشعب الكويتي لانهم جذابين .. فقام مشكورا بالتفكير طويلا وبحث في غوغل .. شفتو الناس اللي تفهم ؟


مالت عليكم من ناس ما تفتهم صارلكم سنين تتناقشون .. والبروفيسور العنجري حلها بدقيقتين و7 ثواني بالضبط



لانه اشتراكه بطيء وكمبيوتره 3 بانتيوم .. لو كان يملك معدات متطوره جان حل السالفه بدقيقه فقط ...



هذا وجاءنا خبر بأن موقع Yahoo مستعد كل الاستعداد لتزويد نواب مجلس الامه الكويتي بكل ما يريدون معرفته
عن ما يحصل بـ ديرتهم .
كل الشكر

الخميس، 12 نوفمبر 2009

اطلب الكاسور ولو كان بالصين




























* * * * * * * * * * * * * * *
نبارك لكل من فرقة بلال الشامي والمخضرمين فرقة التلفزيون ومطربين العدني
ستصبحون اضافه الي فنكم الرائع .. مدرسين ومراقبين امتحانات طلبتنا وابناءنا بالمدارس
ديربالكم عليهم .. وعلى اياديهم من الطيران والمراويس
الصراحه يا وزيرة التربيه قرار كنا ننتظره منذ زمن طويل .. ريحتينا من اشياء كثيره
ليش اهدي بنتي شيء غالي بمناسبة نجاحها وتفوقها بالدراسه ؟ اهديها غيتار بو طقه استعمال خفيف
وليش اهدي ولدي شي غالي بمناسبة نجاحه وتفوقه بالدراسه ؟ اهديه عود بغدادي وعدد 2 بنقز
واذا نجحو العيال نسوي قعده بالفريج .. وما نعطي الفنانين فلوس .. ابناءنا موجودين
فعلا قرار حكيم ! وعمرو دياب
ونتمنى ايضا من الوزيره في حفل التخرج ان تستضيف كل من :
الاستاذ فيصل علوي و ابو بكر سالم . لتسليم شهادات التخرج للطلبه
واليسا وهيفاء وهبي .. لمدارس البنات
وايضا قرارج الحكيم يا وزيرتنا صاحبة الصوت العذب والاذن الموسيقيه
اصبح تهديد شديد القوه .. لشركات الانتاج مثل روتانا والنظائر .. راحت عليكم
الصراحه اتوقع هالكلام الفارغ اللي قلته كلله .. سنقرأه بمقال بأحد الصحف اليوميه من قلم يعشق التقلقس مع الوزراء والنواب
طول عمرنا ندرس موسيقى .. كـ ترفيه فقط لا غير
اما ان يأتيني ولدي ناجح بالكيمياء والرياضيات والدين ... ولكنه حزين لانه ساقط بالموسيقى !!
اسمحيلي حضرة الوزيره .. قرارج ممكن يكون صح .. لكن مكانه غلط !!
تقدرين تأخذين افكارج وطموحاتج وتتجهين الي شارع احمد عرابي بالقاهره .. او شارع بابريجه باليمن
وان تم الرفض .. لديك فرصه بحي الطرب في بغداد .. اما الكويت .. نعتذر منك .. مستوانا ارفع من قرار هشك بشك
وتقبلي تحياتي واهديك .. كرتون بربس

نائبان و وزيرة .. تطلع فيهم بــــاون

مع استمرار الكوميديا .. و ( حي الميد ) السياسيه من قبل بعض الشخصيات الطرطنقيه

طبعا .. تستمر صحافتنا الغبيه .. بنشر كلمات شخصيات كرتونيه


من بعد سلسلة سخافات اجبر الشارع الكويتي على قراءتها !

لم يمل ويكل .. كل من .. الهذره .. هايف .. والقرقه .. الدويسان

يقول الاخ هايف اللي كنت احترم تصريحاته ( سابقا )

بما ان المدارس سمحت للطلاب بالدوام رغم مرض انفلونزا الخنازير , لماذا لا تمنع الشيشه ؟

من ذاك اليوم ولحد الان وانا ودي اعرف شنو الرابط والعلاقه بين الجملتين اللي قارنهم النائب محمد هايف !!

نقول لـ هايف .. دولة الكويت بها أمور ومشاكل اكبر واعظم من الشيشه ! يا ليت تركز شوي وتفكر شوي قبل لا تصرح

وتضيع وقتك كـ نائب و وقتنا كـ شعب ننتظر شيء جيد لمصحة الدوله ...

من بعد موضوع هايف .. اصابت الغيره الدويسان ! وأراد ان يصرح تصريح ناري على مبدأ ( غيري مو أحسن مني )

يقول النائب الدويسان .. اطالب وزير الاعلام ضبط كاتب النجف الانجس !

ندور الكاتب ! ماكو يا فيصل أي كاتب كتب مقال عن النجف الانجس ؟

اخيرا اتضحت الرؤية

النائب الفاضل .. يطلب من الوزير ظبط شخص (عللق) على مقال ( عادي ) بموقع الجريدة الالكتروني وليس كاتب

بـ غض النظر عن المشكله او الاهانه على قولة الدويسان

هل تريدون منع الكتاب .. من التعبير ؟ وايضا تريدون منع الشعب من الداخل والخارج من التعليق على ما يكتب ؟

شرايكم .. تغلقون جميع الصحف وهكذا ترتاحون من الجميع ..

بربس .. وعلى طاري بربس

خرجت لنا وزيرة التربية موضي الحمود قبل أيام .. تسولف كثيرا عن انفلونزار الخنازير !!

لخبطتني قلت صار تدوير وحطوها وزيرة الصحه وانا ما ادري ! ولا للحين بالتربية

المشكله لقاء ممل .. لم يتطرقون لاي شي عن التربيه .. غير الكلام الانشائي اللي كل وزير يردده

وأهم جمله قالتها وهي .. نطمح الي وصول مستوى تفكير الطالب الكويتي الي العالميه !

اتمنى من الوزيره .. اللي تطمح كثيرا ان تبقى معنا قليلا بالكرة الارضيه وبالكويت تحديدا

وتحل بعض المشاكل الواقعيه .. مثل الكوادر بوزارتها ومستوى التعليم والتكييف بالدوائر الخاصه بالتربيه

هذه اشياء بسيطه جدا جدا .. نتمنى حللها اولا وعقبها يصير خير

وعلى طاري هايف وفيصل وموضي

ذكروني بــ بربس

السبت، 10 أكتوبر 2009

راسنا صدع منك يا المطوع

على مبدأ
إللي يأررب منهم .. حأتــلوو وأسيح دموو
إنفرد الدويتو المطوع والدويسان بالملعب الفاضي
قال النائب عدنان المطوع ان الكويت تقع في موقع استراتيجي والتوترات من حولنا كثيرة، وذلك فان كل مواطن مسؤول عن امن البلد وكلنا خفراء لوطننا.واضاف المطوع لـ «الوطن» انه اذ كنا نتحدث عن خلايا ايران فان هناك خلايا ايضا تخص دولا اخرى، مشددا على عدم القبول بذلك سواء من حزب الله او من القاعدة ولا نقبل بالارهاب كائنا من كان خصوصا وان هناك ارهاب اعلامي ايضا، مؤكدا بأن جهود وزراة الداخلية واضحة في ضبط الخلايا الارهابية، داعيا لتعزيز الامن على الحدود وان تكون على اهبة الاستعداد لذلك.

( اهم شي عنده .. إن كنا نتحدث عن إيران )

ويعطي باص حق قلب الهجوم اللي يبوش عماره

وزاد الدويسان قائلا انه يجب التأكد من المعلومات التي ذكرت أن حزب الله يحاول اقتحام الكويت وحتى لو لم تكن المعلومات دقيقة فمن الواجب الحذر لان امن الكويت فوق الجميع.

(يجب التأكد وحتى لو لم تكن المعلومات دقيقه )
لا حول ولا قوة الا بالله
نائبنا ( شبه الكويتي ) عدنان المطوع .. شتبي ..
الناس تتكلم عن حزب الله وخلاياه .. والحبيب يقول .. ترى مو بس إيران في دول ثانيه !!
منو الدول الثانيه أسبانيا ولا جزر المالديف مثلا .. عندهم هالحزب
حتى هنديتنا تعرف أساس حزب الله سواء بـ لبنان ولا الكويت ولا البحرين .. الشركه الام هـي إيران ..
اللي كل ما طرى اسمها ضرب عندك القولون وانبطت مرارتك ..
والثاني
يبي يتأكد وما يبي يتأكد متردد من داخله .. الفقير
ايران الكويت ايران الكويت ايران الكويت ايران الكويت ايران الكويت ايران الكويت .. صعبه
بالله هذه مو مسألة أمن دوله وداخليه ودفاع ؟ واستخبارات وعمات عين
انتو شكو ؟؟ بعرف
هالتصريحات ليش؟ بعرف
عشان إيران بالموضوع بس ..
مشكله
أمس بو نباح وينابحون .. واليوم ولاء لايران من داخل المجلس
وذاك ليبرالي لكن مسلم شلون ما ادري !!.. واللي يمه ياكل قستق وما يدري عن شي
والابله .. تقول اذا اخترق امن الوطن ينتهي كل شي .. يا سلام عليج يا أبله .. تونا ندري ..مبدعه يا بدعه
يعني تشكيله نواب .. عذاب
لو مــبنى مجلس الامه يتحرك .. جان قط نفسه بحر

الجمعة، 9 أكتوبر 2009

المصبنه والخمه ( 1 ) - مجلس الامه ( 0 )




















دعا النائب خلف دميثير الحكومة الى أن تحول البلاد الى ورشة عمل وتطلق المشاريع التنموية والاقتصادية واضعة كل المعوقات خلف ظهرها قائلا: «اللي يبي ينابح.. ينابح» في اشارة الى معرقلي العمل الحكومي ودعاة التأزيم. واكد في تصريح صحفي امس ان حوالي 42 نائبا مستعدون لدعم اي توجه حكومي ينعكس بالفائدة على الوطن والمواطن، داعيا الحكومة الى الاستفادة من هذا المناخ الايجابي، محذرا في الوقت نفسه من ان الحكومة ستفقد ثقة المجلس في حال لم تنجز شيئا. وانتقد دميثير النائب وليد الطبطبائي على تصريحاته التي اعتبر فيها ان المجلس الحالي مزوّر وان قيمة الدينار الكويتي ستصبح اقل من مثيله العراقي، مستغربا هذا التشاؤم الذي يرمي الى ترويع الناس. وشدد على ضرورة ابتعاد الحكومة عن اي تردد في اتخاذ القرارات لسحب البساط من تحت اقدام «المؤزمين» المشككين بالانجاز، داعيا الحكومة الى مواجهة اي استجواب يقدم لها وقبول الانتقادات والرأي الاخر، واصفا ذلك بمتطلبات الديمقراطية. وتوعد دميثير كل من يسعى الى التأزيم بالتصدي له، مستبعدا اي حل لمجلس الامة لعدم وجود مبرر لذلك .

~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~

بذمتكم مو فشله ؟


قبل ..


اذا تجمعو مصبنه عن فرع ولا بقاله .. تعال اسمع الالفاظ الواطيه وقللة الادب .. وبطول بيبسي وقطوف زقاير محذفه ..

ومع هذا الشكل المقزز ... عادي لانهم فئه لا تهش ولا تنش اذا بيضايقون !! يضايقون راعي البقاله فقط .. ومصبنه شتقولهم .

لكن لما تصدر الالفاظ الواطيه .. من مكان محترم ( أعتقد ) مثل مجلس الامه ونائب مثل .. خلف دميثير بالسن كبير وبالعقل صغير .


.. وتتكلم عن انجاز وديمقراطيه وورشة مشاريع .. وهذا اسلوبك !

خليت نص المجلس سلق والنص الثاني بوليسيه .. اذا هذا رأيك فيهم

اقعد وياهم بجاخورك وسبهم ويسبونك .. وناركم تاكل حطبكم كيفكم ..

لكن لما تصرح بالصحف الرسميه ودول الخليج تقرأ .. نائب كويتي .. يقول نباح وينابح

غلط وعيب وقللة أدب

انته جذيه مسيت كرامة الوطن والحكومه والشعب وسمعة الديره بين هالدول ..

واللي مثلك ما نبيه يا دميثير .. الكوميديا مالت رابعه متوسط مكانها مو بالمجلس ولا بالصحف

ونبي سمو الامير يحاسبه

لانه لجنة الظواهر السلبيه المغوليه .. ما تدري وين الله حاطها

والرقابه على تصريحات البعض بالصحف .. معدومه

فشلونا وتعبونا وزهقونا .. هالنوعيه ..

ترى سوق الحمام فيه كراسي نفس المجلس .. يا دميثير

سو نقل خدمات هناك .. عشان يكون لاسلوبك جمهور يصفقلك .. وينبح

قللة حيا

الجمعة، 18 سبتمبر 2009

إهداء للحكومه وللمجلس وصحافتنه وياهم

يقول الضويحي الله يرحمه

من عاب عابوه .. في نسبه وفي حسبه

العيب في داخلك يا شين بس حس به

عيبك عدد شعر راسك عدده و حسبه

* * * *

ولو عايش جان قال

يا مجلس يا حكومه ملينا منكم .. نشبه

بعد ما كنا درة الخليج .. صرنا للصومال نشبه

ليتكم فحم بدوه .. نزيده قاز ونشبه

يمكن ترد امجادنا ويتغير الحال

وخير الكلام ما قل ولا دل

الأحد، 13 سبتمبر 2009

فن منحط .. و وجه منبط
















كرهنا بنات الديره .. كرهنا الدلــع .. كرهنا اللغه الكويتيه والعربيه

مخارج الحروف عندج ضايعه .. ميخالف .. مليقه ودمج قهوه ساده .. ميخالف

وصلت لـغاية حتى اللي يشاركون بالبرنامج يضحكون عليج !


عيل شايب داق من السعوديه ولما يفوز تقوليله .. عاااافيه علييييك شااااتوووووور !! شتور

قول معاي .. ألالالالالالالالالالالالاه .. سكت الريال وإستحى مو عارف شيقول وما ألومه


يدقون من المغرب تقولهم قولولي ألالالالالالالالالالالالالالالاه بالمغربي

يدقون من سوريا تقولهم قولولي ألالالالالالالالالالالالالالالاه بالسوري

يدقون من مصر تقولهم قولولي ألالالالالالالالالالالالالالالاه بالمصري


حليمه بـ رغم مصاختج .. تبقين أفضل من غيرج

* * * * * * * * * * *



















مثلا .. أخ العرب هذا ماله حل
وما ادري منو الاصمخ اللي قايلها ضحكتج حلوه ...

فزت معانا هاها هوهو هيهي من معاي هاي هو ها مشكور ها هي هو !

الحمدالله والشكر بس



* * * * * * *



















لوزه وموزه


لا بكوميديا فالحين .. لا بدراما فالحين .. لا بعمات عين فالحين


نصيحه لا تكملون المسلسل ..


لوزه روحي جابلي صالونج

وموزه قعدي معاها



* * * * * * * * * *


والباجي ... أخيه يا قلبي ماني حاط صورهم حفاظا على الذوق العام


ويوه كللها براطم وخدود وياليت حلوين .. لقيمات هنود


وعلى طاري التتفخ وعمليات التفجير اللي مسوينها هالشله ..


مو حرام اللعب بخلقة الله سبحانه وتعالي .. بعرف شلون تصومون وشلون تصلون ؟




يعني تلفزيون الكويت من بعد العصر الذهبي .. على الاقل يصير فضي برونزي خشبي أي شي


لكن هالمستوى الهابط من قصص وممثلين وأشكال


ما يختلف اثنين انه اغلب مسلسلاتنا


ممثلين عاهات .. ولا متان .. يصيرون كومبارس

والباجي يتطنزون عليهم .. شفت ويهك وشفت بطنك وشفتي خشمج .. انزين وبعدين


واخرتها يطلع لنا واحد تافه ويعيب على الدراما التركيه .. فيها سلبيات اي نعم


لكن ما فيها هالزباله الفكريه اللي نشوفها بـ برامجنا

يا العراقيين .. إحنا إلكم .. مشتاقين



شالفرق بين الفضائيات الكويتيه والعراقيه .. برمضان



لا تفكر وتعب نفسك .. ماكو فرق













عبدالناصر درويش والبلام .. صايرين مي و وحيد .. ملينا من سخافاتكم



كل الحلقات تمثلون انكم عراقيات !! نسيتو انتو بالكويت ؟ ماني قايل نسيتو انكم كويتيين لانها ما تركب



والاهم نسيتو انكم رجال .. تعودتو اشوف




خلصنا ؟



لا ما خلصنا





مسابقات نواف القطان .. فازت كويتيه شيقول الاخ .. انا سعيد انج فزتي وحاس انج محتاجه المبلغ



.. طاره عند باب بيتكم البنيه ؟ فازت وانتهى الموضوع هالكلمه ليش بعد



ولكن اذا الاتصال من العراق المجيد .. تحوشه رجفيه وهاي شلوونكم واحنا مشتاقين إلكم

وغصب غنولي شي عراقيي .. انزين ما يبون يغنون غصب اهو ؟ يغني اهو بدالهم

مرينا بيكم حمد


تحط سكوب ولا مسلسل عراقي اصلي .. يه ..



تطق فره ثانيه .. ولا داوود حسين مطلع زدوده .. انزين نطالع ولا القصه عن عراقي زوجته العراقيه مسويتله سحر ورايحين حق ساحر عراقي .. نبي شي كويتي .. ماكو يقولون حرام





مسلسلات بالجمله .. ما تدري شتطالع وشتخلي .. لكن الشي اللي يميزهم كللهم



انه لازم فيهم ممثله بكل المسلسلات تقول هاي شبيك ؟ والمشهد الثاني تقول أمبيييه

انزين طلعت منج شبيك كمليها وقولي يااا يااا به ؟؟؟ شكو أمبييه يعني قالت أمبييه كويتيه



تلفزيون الكويت .. بصراحه لوعت جبدنا الله يلوع جبدك